• Eddemannak.jpeg
  • Foto: Lena Kristianssen
  • Reingjærde
  • Catwalk
  • Brygge
  •  17 mai
  • toppbilde 1
  • toppbilde 2
logo

Dikšuma ja fuolaheami ja Veahkkebálvalusa doaimmahagat heaittihuvvojit!

Unjárgga gielddas leat guokte doaimmahaga gieldda dearvvašvuođa ja divššu várás. Golggotmánu 31. beaivvi mii heaittihat dikšuma ja fuolaheami ja veahkkebálvalusaid doaimmaheami, ja ásahat skábmamánu 1. beaivvi 2022 rájes guokte ođđa doaimmaheami.

Dan guovtti doaimmahahkii biddjojit buot “boares” doaimmahahkii guoskevaš bargobihtát, earret go PP-bálvalus, mii ovdal lea gullan veahkkebálvalusa vuollái. Dát bargu sirdojuvvo dál gielddadirektevrra bargojovkui skábmamánu 1. beaivvi rájes.

Unjárgga gieldda guovtti ođđa doaimmahaga namat leat:

  • Orruma ja fuolahusa doaimmahat
  • Dearvvašvuođa ja eastadeaddji doaimmahat

Dán guovtti ođđa doaimmahaga ásaheami mearrin lea čohkket orrumii ja fuolaheapmái guoskevaš doaimmaid ovtta doaimmahahkii nannen dihtii gieldda bargguid dearvvašvuođa suorggis (nugo doavttirfálaldaga čuovvoleapmi) ja maiddái dearvvašvuhtii guoskevaš eastadeaddji barggu.  

Doaimmahagaid ođđa jođiheaddjit!

Dálá dearvvašvuođa ja fuolaheami doaimmahaga jođiheaddjis lea vuoigatvuohta sajáidahttot jođiheaddjin nubbái dan guovtti ođđa doaimmahahkii. Dálá veahkkebálvalusa doaibmajođiheaddji lea gaskaáigásaččat virgáiduvvon, iige sus dan dihtii leat vuoigatvuohta sajáidahttot jođiheaddjin.

Dan geažil nuppi ođđa doaimmahahkii virgáiduvvo gaskabođđosaččat jođiheaddji. Eambbo dieđut ođđa doaimmahaga jođiheaddji virggiid birra bohtet gaskavahku golggotmánu 26. beaivvi.

Orruma ja fuolahusa ja dearvvašvuođa ja eastadeami doaimmahaga jođiheaddjiin galgá leat lagas ovttasbargu. Dát mearkkaša ahte soai galgaba oktiiheivehit ja buohtalastit dan guovtti doaimmahaga bargguid vahkkosaš čoahkkimiin.

Oanehaččat orruma ja fuolahusa doaimmahaga birra:

Orruma ja fuolahusa doaimmahagas leat skábmamánu 1. beaivvi rájes guokte ossodaga:

  • Institušuvnna ossodat (maiddái gievkkanbálvalus)
  • Ruktui gullevaš bálvalusa ossodat (ruovttuveahkki, ruovttubuohccedikšun, veahkkeneavvukoordináhtor, ja orrun- ja veahkehanbálvalus)

Oanehaččat dearvvašvuođa ja eastadeaddji doaimmahaga birra:

Mis lea leamašan geanohis organiseren dássážii dearvvašvuođa suorggi čuovvoleami hárrái gielddas. Dan dihtii lea ge hálddahusas leamašan menddo uhcán doaibmanákca čuovvolit dán suorggi bargiid, ja maiddái gieldda ovttasbargošiehtadusaid Deanuin dearvvašvuođasuorggis, oaivvilda gielddadirektevra.

Stáhtahálddašeaddji lea addán midjiide máhcahusa, mas muitaluvvo ahte gielddas lea stuorra buoridanmonni álbmotdearvvašvuođa dávddaboahtinhehttehusa bargguin. Dán doaimmahagas galgá ge leat ovddasvástádus dávddáboahtinhehttehusa bargguin ja maiddái dearvvašvuođasuddjen bargguin.

Gielddadirektevra nanosmahttá ge min bargguideamet dearvvašvuođas ja dávddáboahtima eastadeamis dan láhkai ahte dearvvašvuohta ja dávddaboahtima eastadeapmi šaddet sierra doaimmahahkan skábmamánu 1. beaivvi rájes.

Dán doaimmahahkii gullet čuovvovaš barggut:

  • Ovddasvástádus čuovvolit gieldda ovttasbargošiehtadusa Deanu doavttirfálaldagain (jus gielddastivra juovlamánus vállje ásahit Unjárgga gildii iežamet doavttirfálaldaga, de doavttirfálaldat gullá dán doaimmahahkii)
  • Doavttirkantovra ja laboratoorija
  • Fysioterapeuta/čuovvolit min šiehtadusaimet fysioterapeutain
  • Dearvvašvuođadivššár
  • Álbmotdearvvašvuođabargu/dearvvašvuođasuddjen barggut
  • Jorttamovra (sealgeeadni)
  • Ergoterapeuta
  • Psykiatriija dearvvašvuođadivššár
  • Gárrendillái guoskevaš barggut
  • Gielddapsykologa

 

Dássážii leamašan nu ahte mis eai leat buot dát bálvalusat gielddas, muhto mis lea leamašan ovttasbargu kránnjágielddaideametguin, vai nagodivččiimet fállat muhtun dáin bálvalusaiguin.

Ođđa doaimmahaga ovddasvástádussan šaddá árvvoštallat mo Unjárgga gielda nákcešii fállat dáid bálvalusaid gieldda ássiide.

Tips en venn  Skriv ut
Web levert av CustomPublish AS